Internetde robotyň ýokary takyklyk bilen mermerden adam heýkelini ýasaýandygyny görkezýän wideo ýaýrady. Renessans stilinde heýkelleri döredýän EA roboty Monumental Labs kompaniýasy tarapyndan döredildi. Maşyn daşy suw bilen sowadyp ýonýar we öň diňe adam güýjüne başardar diýlip hasaplanan işi ýerine ýetirýär.
Bu wideo çekişmelere getirdi. Käbir adamlar bu tehnologiýany “sungaty ýok ediji” diýip atlandyryp, döredijilik işiniň geljegine alada bildirdi. Beýlekiler bolsa onuň täze mümkinçiliklerine ünsi çekdi.
“Biz hudožnikleri çalyşmaýarys-da, olara gural berýäris. Biziň maksadymyz ozal millionlarça baha durup, köpýyllyk işi talap edýän zady köp sanly sargyt edijiler üçin elýeterli etmek” – diýip, kompaniýanyň wekili belledi. Monumental Labs öz programma we enjam üpjünçiliginiň daşyň ýonulmagyny kem-kemden awtomatizirläp, çykdajylary 90% azaldýandygyny belleýär.
Kompaniýa üç ölçegli skaneri we programmirlemäni ulanýar. Hudožnik modeli döredýär, EA ony seljerýär we robota hereketleriň yzygiderliligini berýär. Maşyn esasy işi ýerine ýetirýär, heýkeltaraş bolsa ony eýýäm kämil ýagdaýa getirýär.
Kompaniýa ahyrky ownujak işler üçin barybir adam eliniň gerekdigini belleýär.
Monumental Labs bir robotdan başlap, 19 hünärmenden ybarat topara çenli giňeldi. Nýu-Ýorkda onlarça ussatlaryň we robotlaryň işlejek ussahanasy gurulýar. Tehnologiýa çylşyrymly bezegleri we barelýefleri döretmek işini çaltlaşdyrýar.
