ABŞ-nyň Massaçusets ştatynyň Kembrij şäherinde geçirilen RR Auction auksionynda, Aýa aýak basan ilkinji adama – Nil Armstronga degişli bolan altyn «Omega Speedmaster Professional» sagady satyldy. Ol 2,1875 million dollara satyldy we bu görkeziji astronawtlara degişli sagatlar boýunça täze rekord hasaplanýar diýip, «Space.com» habar berýär.
Ozalky rekord 2,163 million dollar bolup, ol Edgar Mitçelliň 2024-nji ýylyň güýzünde satylan «Rolex GMT-Master» sagadyna degişlidi.
Armstrongyň sagady 18 karatly altyndan ýasalan bolsa-da, ol hiç wagt Aýa äkidilmedi. Bu sagat oňa 1969-njy ýylyň noýabr aýynda, ýagny «Apollon-11» missiýasyndan dört aý soň, «Omega» kompaniýasy tarapyndan sowgat berlipdir. Şol dabarada, Hýuston şäherinde jemi 26 astronawta atlary ýazylan şeýle sagatlar gowşurylypdyr.
Sagadyň yzky gapagynda Armstrongyň ady, 17 belgisi we sowgatlyk ýazgy bar.
Sagady satyn alan adam öz adynyň aýan edilmegini islemändir. Sagadyň satylmagy bilen gazanylan serişdeleriň ýarysy, ýagny azyndan 850 müň dollar «Nil Armstrongyň ynanýan maksatlaryna» bagyşlanar.
Armstrongyň sagady auksionlarda kosmos bilen bagly satylan iň gymmat zatlaryň sanawynda üçünji orunda dur. Ol 2011-nji ýylda işewür Ýewgeniý Ýurçenko tarapyndan 2,88 million dollara satyn alnan «Wostok ZKA-2» sowet gämisiniň kapsulasyndan we Bazz Oldriniň 2022-nji ýylda 2,77 million dollara satylan Aýa uçanda geýen formaly penjeginden soň gelýär.
