Mercedes-Benz kompaniýasy «Stronger Than The 1980s» (1980-nji ýyllardanam güýçli) atly çäkli nusgada çykaryljak G-Class modelini hödürledi. Bu model 1979-njy ýylda öndürilip başlanan taryhy «W460» ulagyndan ylham alnyp taýýarlanyldy. Bu barada «Automotive World» habar berýär.
Retro äheňdäki dizaýny häzirki zaman tehnologiýasy bilen utgaşdyrýan modelden bary-ýogy 460 sanysy öndüriler. Ýewropada bahasy 178 müň ýewrodan başlaýar. Ilkinji ulaglar müşderilere 2025-nji ýylyň ahyrynda gowşurylyp başlanar.
Ulagyň kuzowy üç taryhy reňkde hödürlenýär: ýaşyl, krem reňkli we çägesöw. Daşky görnüşi mämişi yzky çyralar (poworotnikler), gara bezeg elementleri, bäş spitsaly diskleri we öňki görnüşdäki Mercedes-Benz logotipleri bilen tapawutlanýar.
Islege görä ýörite syýahat üçin niýetlenen ekspedisiýa bagažnigi bilen hem enjamlaşdyrylyp bilner. Şeýle-de kuzowynda G-Class modelleriniň synagdan geçirilýän ýerleriniň (poligonlaryň) biri bolan Şokl dagynyň şekili bolan nyşan ýerleşdirilen. Salony gara deri bilen çal-gök mata we ýörite seriýanyň nyşanlary bilen bezelen.
Tehniki taýdan iki görnüşde hödürlenýär: turbodizel G 450d (362 at güýji) ýa-da benzinli G 500 (443 at güýji). Iki görnüş hem 9 basgançakly awtomatiki karobka we doly herekete getiriji ulgam bilen enjamlaşdyrylan. Öndüriljek her ulaga «# of 460» (meselem, 460-yň birinjisi) ýazgyly ýörite bellikler ýerleşdiriler, bu olaryň näderejede seýrekdigini görkezer.
