Ýewropa kosmos agentligi (ESA) 2025-nji ýylyň 12-nji martynda Marsyň golaýynda grawitasiýa manýowryny eden wagtynda Hera zondunyň düşüren suratlaryndan döredilen wideony ýaýratdy. Wideoda apparatyň Gyzyl Planeta ýakynlaşýandygy görkezilýär. Bu manýowr zonduň traýektoriýasyny düzetmäge we kamerasyny barlamaga kömek etdi.
Gözegçilikler ýakynlaşmadan dokuz gün öň, Mars zonddan 7 million kilometr uzaklykdaka we gyzylymtyl tegmil ýaly bolup görünýärkä başlandy. 200 müň kilometr aralykdan kamera ýygy-ýygydan surata düşürip başlady, polýar telpegini we planetanyň üstündäki jikme-jiklikleri surata aldy.
Şeýle hem, zond 297 kilometr aralykdan Marsyň hemrasy Deýmosy planetanyň fonunda surata düşürip görkezdi. Marsa 5670 kilometr ýakynlaşanda kamera şol ýerdäki kraterleri we egrem-bugramlyklary dury edip ýazga aldy. Manýowryň soňky tapgyrynda zond Fobosy 13 000 kilometr aralykdan surata aldy, ýöne yşygyň düşüşine görä, hemra ýarym Aýa meňzeýärdi.
Suratlar diňe bir ylym üçin gymmatly bolman, eýsem zonduň tehnologiýasyny barlamak üçin hem ähmiýetlidir. Hera 2026-njy ýylyň dekabrynda Didimosa we Dimorfosa baryp ýeter hem-de bu asteroidleri öwrenmäge taýynlanýar. Apparatyň Marsyň ýanyndan uçup geçmegi ESA-nyň alymlaryna geljekki esasy missiýa üçin apparatyň mümkinçiliklerini barlamaga mümkinçilik berdi.
