Xiaomi smartfonlar üçin bir kristally ulgamlary (SoC) işläp taýýarlamak boýunça ýörite bölüm döretdi. Taslama Qualcomm-yň öňki uly direktory Sin Muýun ýolbaşçy boldy. Ol gönüden-göni kompaniýanyň esaslandyryjysy we baş direktory Leý Szýuna hasabat berer.
Xiaomi ozal öz çiplerini taýýarlamaga synanyşyk edipdi. Kompaniýa 2017-nji ýylda 28-nm tehproses boýunça döredilen sekiz ýadroly 64 bitlik prosessor Pengpai S1-i hödürledi. Ol Xiaomi 5C smartfonynda ulanyldy.
Soňra kompaniýa ýene birnäçe kömekçi çipleri işläp taýýarlady. Pengpai C seriýasy şekilleri işlemek, P seriýasy çalt zarýad beriş, G seriýasy energiýany dolandyrmak, T seriýasy signaly güýçlendirmek, D seriýasy displeýler üçin niýetlendi. Bu çözgütler esasy prosessorlaryň ornuny tutmady, ýöne kompaniýa tehniki tejribe toplamaga mümkinçilik berdi.
Çeşmäniň maglumatlaryna görä, täze SoC sekiz ýadroly bolup, ARM arhitekturasyna esaslanar. Onda 3,2 GGs ýygylyk bilen bir Cortex X925 ýadrosynyň, 2,6 GGs bilen üç Cortex A725 ýadrosynyň we 2,0 GGs bilen dört Cortex A520 ýadrosynyň bolmagyna garaşylýar. Esasy ýadro MediaTek Dimensity 9400 çibinde ulanylan ýalydyr.
Grafika bölegi 1,3 GGs ýygylyk bilen GPU Imagination Technologies IMG DXT72-niň esasynda gurlar. Deslapky maglumatlara görä, bu çip Qualcomm-yň Snapdragon 8 Gen 2 çipsetinde oturdylan Adreno 740-dan güýçli bolup biler.
