Hindistanyň we Bangladeşiň ýaşaýjylary 15-nji aprelde bengal Täze ýylyny baýram etdi. Bu ýerli ýyl hasaby boýunça 1432-nji ýylyň başlanandygyny aňladýar. Grigorian senenamasy bilen tapawut, takmynan, 594 ýyla deň diýip, Times of India habar berýär.
Pohela Baýsah hökmünde belli bolan bu baýramçylyk Boýşah aýynyň birinji gününe gabat gelýär. Ol Günbatar Bengaliýa we Tripura hindi ştatlarynda, şeýle-de tutuş Bangladeşde bellenilýär.
Şu ýyl bu sebitleriň ýaşaýjylary baýramçylyk mynasybetli dabaraly ýörişleri, konsertleri, halk tanslaryny we köçe tagamynyň festiwallaryny gurady. Esasy dabara – Mangal Şobhajatra baýramçylyk ýörişi Dakkada we Kalkuttada geçirildi. 2016-njy ýylda ÝUNESKO bu ýörişi maddy däl medeni mirasyň sanawyna goşdy.
Bengal Täze ýyly ilkinji gezek 1584-nji ýylda, hasyldan soň salgydy ýygnamagy aňsatlaşdyrmak üçin täze senenama girizilende baýram edilip başlandy. Indi bu gün bengallar bergilerini üzmäge we ýyly arassa sahypadan başlamaga çalyşýar. Olar üýtgeşmeleri alamatlandyrýan täze eşikleri geýýär we däp bolan tagamlary taýýarlaýar: fermentirlenen tüwi panta bhaat, hilsa balygy we süýjülikler.
Bangladeşde Pohela Baýsah – döwlet baýramy.
