18-nji aprele geçilen gije Ýewropa ligasynyň 1/4 finalynyň jogap oýunlary tamamlandy. Olaryň jemi boýunça ýaryşyň ýarym finalyna gatnaşyjylar kesgitlendi.
Angliýanyň “Mançester Ýunaýtedi” goşmaça wagtda fransuz “Lionyny” (5:4), Bilbaodan “Atletik” Şotlandiýanyň “Reýnjersini” (2:0), iňlis “Tottenhemi” nemes “Aýntrahtyny” (1:0), Norwegiýanyň “Budýo-Glimt” topary bolsa penalti boýunça italýan “Lasiosyny” (3:1, penalti 3:2) utdy.
“MÝ” – “Lion” oýny ýaryşyň taryhynda iň bir täsirli oýunlaryň biri boldy. Angliýa kluby hasaby 2:0 edip, arakesmä gitdi, ýöne ikinji ýarymda iki goly sypdyrdy. Tolisso ikinji sary duýduryşy alandan soň, fransuz kluby 89-njy minutda azlykda galdy. Ýöne bu “Liona” goşmaça wagtda ýene iki gol geçirmäge päsgel bermedi – Şerki we Lýakazett tapawutlandy.
Birbada “MÝ-niň” şu möwsümde iň uly ýeňlişleriň birine sezewar bolmagyna garaşylypdy, ýöne Fernandeş 11 metrlik urgudan gol geçirip, ýer eýelerine umyt berdi, Kobbi Meýnu bolsa 120-nji minutda olary ýaryşy terk etmekden halas etdi.
Bir minutdan soň bolsa iňlis klubunyň merkezi goragçysy Maguaýr hüjüme geçip, kelle urgusy bilen topy uzak ştanga iberdi. Şeýlelikde, “Mançester Ýunaýted” ýarym finala ýollama aldy. Gapma-garşylykda umumy hasap – “MÝ-niň” peýdasyna 7:6.
“Atletik” 13 ýylyň içinde ilkinji gezek ýarym finala çykdy. Topar Sansetiň (penalti) we Uilýamsyň (kelle urgusy) gollary bilen “Reýnjersi” utdy.
Dominik Solanke penaltiden gol saldy we bu “Tottenheme” “Aýntrahty” utmak üçin ýeterlik boldy.
“Budýo-Glimt” erkekleriň arasyndaky ýewrokubogyň ýarym finalyna çykan ilkinji Norwegiýa kluby boldy. Öýünde 2:0 utandan soň, Rimde 1:3 hasabynda utulyp, topar penalti tapgyrynda ýeňiş gazandy.
Ýarym finalyň garşydaşlary:
- “Tottenhem” – “Budýo-Glimt”
- “Atletik” – “Mançester Ýunaýted”
“Tottenhem” UEFA-nyň Kubogynyň / Ýewropa ligasynyň finallarynda üç gezek oýnap, 1972-nji we 1984-nji ýyllarda kubok aldy. “Mançester Ýunaýted” iki gezek gatnaşdy we bir gezek utdy, “Atletik” iki finalda-da utuldy.
Ýewropa ligasynda ilkinji ýarym final duşuşyklary 2-nji maýa, jogap oýunlary 9-njy maýa geçilýän gije bolar.
Ýaryşyň final oýny Ispaniýada “Atletigiň” “San-Mames” öý stadionynda geçer. Kubogyň häzirki eýesi Italiýanyň “Atalanta” klubudyr.
