Meksikanyň Gerrero ştatynyň daglarynda ýerleşýän Tlaýokok gowagyndan ýitip giden tlakotepeua halkyna degişli däp-dessur sowgatlyklary tapyldy. Tapyndylar nusgawy eýýamdan (950-1521) soňky döwre degişli diýip, Heritage Daily neşiri habar berýär .
Bu açyş Adrian Beltran Dimas we Ýekaterina Pawlowa tarapyndan edildi. Olar birnäçe ýyllap sebitiň gowaklarynyň kartasyny düzdüler.
Tlaýokok gowagynyň aşaky gatynda barlagçylar ozal mälim bolmadyk bir otaga alyp barýan, suw basan geçelgäni gördüler. Şol ýerde olar artefaktlaryň – haşamlanan balykgulakdan ýasalan bilezikleriň we pirit aýnalaryna meňzeýän tekiz gara daş diskleriň üstünden bardylar.
Haşamlar ýüzler we nagyşlar görnüşinde bolup, tlakotepeua halkynyň dünýäniň döreýşi we hasyllylyk baradaky pikirleri bilen baglanyşyklydyr diýip çaklanylýar. Artefaktlar stalagmitleriň arasyndan tapyldy, ähtimal däp-dessurlar maksady bilen tegelek şekil berlen bolsa gerek.
Neşiriň ýatlap geçişi ýaly, köp mezoamerikan medeniýetlerinde gowaklar mukaddeslik hasaplanypdyr. Adamlar olarda ýerasty dünýä girelgeleriň bardygyna hem-de tebigatyň taňrylarynyň we ruhlarynyň ýaşaýandygyna ynanypdyrlar.
