Toyota «GR Supra-nyň» bäşinji nesli bilen hoşlaşýar: «MkV Final Edition» atly iň soňky wersiýa 2025-nji ýylyň ýazynda ABŞ-nyň bazaryna çykar. 69 müň dollar bahasy bilen, Ýewropadaky «A90 Final Edition» modelinden iki esse diýen ýaly arzan, emma şoňa görä-de onuň kuwwaty hem pesräk. Ýewropadaky wersiýasy 429 at güýjüni öndürýän bolsa, ABŞ-daky 382 at güýjüni öndürýär. Bu barada «HotCars» habar berýär.
Täze «Supra» 3,0 litrlik turbomotor bilen enjamlaşdyrylan we alty basgançakly mehanika ýa-da 8 basgançakly awtomatiki karobka bilen hödürlenýär. Differensialy, asma ulgamy we Brembo tormozlary kämilleşdirilen, şeýle hem Michelin tekerler we uglerod (karbon) bezegler goşulypdyr. Salony alkantara material, gyzyl howpsuzlyk kemerleri we eksklýuziw elementler bilen bezelen.
Awtoulagyň daşky görnüşi «GT4-i» ýatladýar: mat görnüşli (ýalpyldamaýan) 19 dýuýmlyk diskleri we uglerod süýümli spoýleri onuň ýaryş ruhuny has-da güýçlendirýär.
«Supra MkV-niň» önümçiligi 2026-njy ýylda doly bes ediler. Toyota eýýäm täze nesil sportkaryň üstünde işleýär. Onda yzky tigirlerden herekete getiriji ulgam saklanyp galar, emma hereketlendirijisi barada heniz anyk maglumat ýok.
