Adobe kompaniýasy Photoshop we Premiere Pro programmalaryna EA kömekçilerini goşmagyň üstünde işleýär. Bu barada Adobe-iň sanly media boýunça tehniki müdiri Ilaý Grinfild kompaniýanyň blogunda habar berdi.
Photoshop-da “döredijilik agenti” atly täze EA kömekçisi Actions paneli arkaly elýeterli bolar. Ol suraty seljerip, düzedişleri, mysal üçin, artykmaç obýektleri aýyrmagy ýa-da fonuny bulaşdyrmagy teklip eder. Üýtgeşmeler saýlanan görnüş tassyklanandan soň ulanylyp bilner diýip, The Verge habar berýär.
Ozal Photoshop-da suratyň üstüni ýetirmek üçin Generative Fill we gerekmejek obýektleri aýyrmak üçin Distraction Removal ýaly EA gurallary peýda boldy. Tejribeli ulanyjylar el bilen redaktirlemegi makul bilse-de, Adobe awtomatik funksiýalary ösdürmegi dowam etdirýär.
Geljekde ulanyjylar kömekçä buýruklary tebigy dilde berip biler. Bu çylşyrymly amallaryň ýerine ýetirilmegini aňsatlaşdyrar. Şol bir wagtyň özünde, alnan netijäni elde hem redaktirlemek bolar.
Premiere Pro wideoredaktorynda kompaniýa Media Intelligence tehnologiýasyny ösdürýär. Indi ol wideoda zerur fragmentleri tapmaga kömek edýär. Geljekde EA islege görä deslapky garalama montažyny ýerine ýetirip biler.
“EA adamyň döredijilik garaýşynyň ornuny tutmasa-da, ol taslamanyň üstündäki işleri çaltlaşdyrjak oýlanyşykly pikirleri teklip etmäge ukyply. Mundan başga-da, ol birnäçe gezek basmak bilen çylşyrymly işleri ýerine ýetirmegi öwredip, redaktoryň hünär ösüşine ýardam eder” – diýip, Grinfild belledi.
Photoshop üçin ilkinji EA agentiniň tehnologiýasy 24-nji aprelde Londondaky Adobe Max çäresinde hödürlener.
