Şu gün, 14-nji aprelde, Blue Origin kompaniýasynyň New Shepard atly suborbital kosmos gämisiniň 31-nji missiýasynyň çäklerinde hususy uçuş amala aşyryldy.
Kosmos gämisiniň ekipažynda alty sany zenan bardy: aýdymçy Keti Perri, kinoprodýuser Keriann Flinn, «CBS Mornings» gepleşiginiň žurnalisti we alyp baryjysy Geýl King, STEMBoard kompaniýasynyň baş direktory we NASA-nyň öňki raketa alymy Aişa Bou, bioastronawtika ugry boýunça gözlegçi alym Amanda Nguen hem-de missiýanyň ýolbaşçysy, Blue Origin kompaniýasyny esaslandyran Jeff Bezosyň gelni Loren Sançes.
New Shepard raketasy ABŞ-nyň Tehas ştatyndaky kosmodromdan, Grinwiç wagty bilen sagat 13:30-da (Aşgabat wagty bilen sagat 18:30-da) uçuryldy. Uçuş, takmynan, 10,5 minut dowam etdi. Uçuşdan 2,5 minut soň, ýolagçyly kapsula raketadan aýrylyp, atmosferanyň we kosmosyň arasyndaky çäk hökmünde kabul edilýän Karman çyzygynyň üstünden geçdi. Zenanlar dartuw güýjünden dört minutlap halas bolup, agramsyzlyk ýagdaýynda boldular, soň gämi Tehasdaky uçurylyş nokadynyň golaýyndaky meýdança sag-aman gondy. Gaýdyp gelenlerinden soň, Keti Perri dyzyna çöküp, Tehasyň topragyny ogşady.
Bu 1963-nji ýylda Walentina Tereşkowa uçaly bäri, diňe zenanlardan ybarat bolan ilkinji kosmos missiýasy boldy. New Shepard kosmos gämisi dolulygyna awtomatik dolandyryşlydy, ýagny ony ekipažyň dolandyrmagy zerur däldi.
Perri uzak wagtdan bäri kosmosa çykmagy arzuw edip gelýändigini aýtdy. «Kosmos ahyrsoňy gözgamaşdyryjy bolar» — diýip, ol uçuşyň öň ýany aýtdy. Ol muny gyzy Deýzi üçin edýändigini aýdyp, şeýle diýdi: «Oňa her kimiň — gelip çykyşyna, milletine, ykdysady ýagdaýyna ýa-da bilim derejesine garamazdan — öz arzuwlaryny amala aşyryp bilýändigini görkezmek isleýän. Ol entek bary-ýogy dört ýaşynda, ýöne eýýämden gaty arzuwçyl. Emma men muny diňe onuň üçin däl, eýsem geljekki ähli nesiller üçin edýärin».
