“Maklaren” toparynyň awstraliýaly sürüjisi Oskar Piastri “Formula-1” çempionatynyň dördünji tapgyry bolan Bahreýniň Gran-prisinde ýeňiji boldy. Ýaryş Sahirdäki awtodromda geçirildi. Bu Piastriniň häzirki möwsümde ikinji we karýerasynda dördünji ýeňşi boldy.
Ikinji orny “Mersedesden” britaniýaly Jorj Rassell eýeledi. Ol 15,499 sekunt yza galdy. Üçünji bolup pellehana Piastriniň topardaşy Lando Norris geldi. Ol öňdebaryjydan 16,273 sekunt yza galdy.
Şeýle-de, iň gowularyň ilkinji onlugyna şular girdi: Şarl Lekler (Ferrari, +19,679), Lýuis Hemilton (Ferrari, +27,993), Maks Werstappen (Red Bull, +34,395), Pýer Gasli (Alpin, +36,002), Esteban Okon (Haas, +44,244), Ýuki Sunoda (Red Bull, +45,061) we Oliwer Berman (Haas, +47,594).
Ýaryşyň netijesinde Lando Norris sürüjileriň umumy sanawynda 77 utuk bilen birinji orny eýeledi. Piastri 74 utuk bilen ikinji orna çykdy. Ol 69 utuk bilen üçünji orna düşen Maks Werstappenden öňe geçdi. Ilkinji bäşlige Jorj Rassell (63 utuk) we Şarl Lekler (32 utuk) hem girdi.
Konstruktorlaryň kubogynda 151 utuk bilen “Maklaren” birinji orny eýeleýär. Onuň yzyndan “Mersedes” (93 utuk), “Red Bull” (71 utuk), “Ferrari” (57 utuk) we “Haas” (20 utuk) gelýär.
“Formula-1” çempionatynyň indiki tapgyry 20-nji aprelde Saud Arabystanynda geçer.
