12-nji aprelde meşhur Counter-Strike 2 şuteriniň (atyşykly kompýuter oýny) serwerleri dünýä boýunça bökdençliklere sezewar boldy. Hut şol gün hem oýun Steam-de täze onlaýn rekordyny goýdy.
Bu soňky üç aýyň içinde bäşinji global bökdençlikdir. Dünýäde müňlerçe oýunçy oýunlardan çykarylyp goýberilýändigini habar berdi. Oýny başlamaga synanyşylanda "Serwer bilen aragatnaşyk ýok" habary peýda boldy.
DownDetector hyzmatynyň berýän habaryna görä, mesele aşgabat wagty bilen 18:45-de başlandy. Bökdençlik Russiýa, Awstriýa, Fransiýa, ABŞ, Kanada, Beýik Britaniýa, Finlýandiýa, Germaniýa we beýleki köp ýurtlara täsir etdi.
Hut şol gün şuter Steam-de meşhurlykda rekord goýdy. Bir wagtyň özünde oýna 1 862 531 adam girdi - bu taslamanyň tutuş taryhynda iň gowy netije. Öňki rekord mart aýynda - onlaýn oýunçylar 1 824 milliona ýetende goýlupdy. Näsazlyk ulanyjylaryň sanynyň köpelmegi bilen baglanyşykly ýüze çykdymy ýa-da ýok, entek belli däl. Oýny işläp düzen Valve kompaniýasy resmi düşündiriş bermedi.
Counter-Strike 2 platformanyň taryhynda iň ýokary onlaýn derejäni eýelemek boýunça diňe Palworld-dan (2,1 million adam), Black Myth: Wukong-dan (2,4 million adam) we PUBG: Battlegrounds-dan (3,2 million adam) yzda galmak bilen, dördünji orny eýelemegini dowam etdirýär.
13-nji apreldäki ýagdaýa görä, Counter-Strike 2 kadaly işleýär, ýöne ulanyjylar wagtal-wagtal kynçylyklara duçar bolýarlar.
