ABŞ-nyň Serhet-gümrük gullugy 12-nji aprelde täze girizilen gümrük paçlaryndan boşadyljak harytlaryň sanawyny çap etdi. Bu sanawa telefonlar, noutbuklar, gaty diskler, prosessorlar, ýat çipleri we ýarymgeçiriji önümçiliginde ulanylýan enjamlaryň birnäçesi degişlidir diýip, «Bloomberg» agentligi habar berýär.
Sanawda görkezilen harytlara Hytaýdan getirilýän önümler üçin göz öňünde tutulan 145% möçberindäki gümrük paçlary, şeýle hem dünýäniň köp ýurtlaryna degişli 10%-lik esasy paç hem degişli bolmaz.
Ak tam bu tema boýunça «Bloomberg-iň» soragyna düşündiriş bermedi.
Agentligiň maglumatlaryna görä, paçdan boşadylan harytlaryň köpüsi ABŞ-da öndürilmeýän, giňden ulanylýan elektron enjamlardyr. Şeýle çözgüt sarp edijiler üçin bahalaryň birden ýokarlanmagynyň öňüni alyp biler, şeýle-de Apple, Samsung we Taiwan Semiconductor Manufacturing ýaly iri öndürijilere goldaw berip biler.
Mundan ozal Donald Tramp ABŞ-nyň daşary ýurtlardan getirilýän ýarymgeçiriji çiplere gümrük paçlaryny girizmek isleýändigini aýdypdy. Emma häzirlikçe bu çäreler güýje girenok.
Häzirki wagtda pudaklaýyn gümrük paçlary 25% möçberindedir, ýöne ýarymgeçirijiler we olara degişli önümler üçin nyrhlaryň takyk derejesi häzirlikçe kesgitlenmedi.
