11-13-nji aprel aralygynda Hytaýyň demirgazyk sebitlerinde ýeliň güýçli öwüsmegine garaşylýar. Şonuň bilen baglylykda, häkimiýetler agramy 50 kilogramdan az bolan adamlaryň güýçli ýeliň täsirinde «uçup gitmeginiň» mümkindigini aýdyp, olaryň öýde galmagyny maslahat berdiler.
Bu duýduryş Hebeý welaýatyna, şeýle hem paýtagt Pekine we Týanszin şäherine degişli. «BBC-niň» berýän maglumatlaryna görä, bu sebitlerde ýeliň tizligi sagatda 150 kilometre çenli ýetip biler. Pekinde şeýle güýçli ýel bilen bagly duýduryş soňky on ýylda ilkinji gezek berilýär.
Hytaýly meteorologlar ýeli 17 ballyk derejede ölçeýär. Dynç günlerinde ýeliň güýji 11-13 bala çenli baryp biler, bu bolsa uly zyýanlara we weýrançylyklara sebäp bolup biler.
Howanyň agyr şertleri sebäpli, ähli sebitleýin sport çäreleri, şol sanda dünýäde ilkinji gezek geçirilmegi meýilleşdirilen adam şekilli (gumanoid) robotlaryň ýarym marafony hem ýatyryldy. Şeýle hem mekdepler, seýilgähler, attraksionlar wagtlaýyn ýapyldy, gurluşyk işleri we otly gatnawlary togtadyldy.
