Beýik Britaniýada uly göwrümli Universal Studios tematik seýilgähi gurlar. Onuň gurluşygyna indiki ýyl başlanylar, açylyşy bolsa 2031-nji ýyla meýilleşdirilýär diýip, «BBC» habar berýär.
Seýilgäh 192 gektar meýdany eýeleýän uly dynç alyş we güýmenje toplumynyň bir bölegi bolar. Ol Ýewropadaky ilkinji Universal tematik seýilgähi bolar – şeýle seýilgähler ABŞ-da, Ýaponiýada, Singapurda we Hytaýda eýýämden bar.
Toplumyň çäginde 500 otagly myhmanhana, söwda merkezi we restoranlar hem ýerleşer. Täze seýilgäh öňki Kempston Hardwick kerpiç zawodynyň ýerinde gurlar. Bilermenleriň belläp geçmegine görä, bu taslama ýurduň ykdysadyýetine 50 milliard funt sterling girdeji getirer, takmynan, 28 müň iş ornuny döreder we ilkinji ýylda 8,5 million myhmany kabul eder.
«Biz şu gün milliardlarça funtlyk maýa goýum boýunça şertnama baglaşdyk. Munuň netijesinde Bedfordda Ýewropanyň iň iri güýmenje seýilgähleriniň biri peýda bolar, bu bolsa graflygy dünýä arenasyna çykarar» — diýip, premýer-ministr Kir Starmer aýtdy.
