Halkara Olimpiýa komiteti (HOK) Los-Anjelesde geçiriljek Olimpiada-2028-e gatnaşjak futbol boýunça erkekler ýygyndylarynyň sanyny azaltdy. Bu barada HOK-yň sport direktory Kit Makkonnell habar berdi.
Ýaryşda öňki 16 toparyň deregine 12 topar çykyş eder. Şol bir wagtyň özünde, zenanlaryň arasyndaky ýaryşda, tersine, toparlaryň sany 12-den 16-a çenli artdyrylar.
Şeýle-de, sportuň beýleki görnüşlerinde hem üýtgeşmeler bolar. Zenanlaryň arasyndaky boks ýaryşynda alty däl-de, ýedi agram kategoriýasynda medallar paýlanar. Ilkinji gezek ýaý atmak, golf, sport gimnastikasy, küreklemek, stol tennisi boýunça we 4х100 metr estafetada garyşyk toparlaryň arasynda ýaryşlar geçiriler.
Ilkinji gezek türgenler 50 metr aralyga arkanlygyna, brass we batterflýaý usulynda ýüzmekde bäsleşer.
Oýunlaryň programmasyna kenarýaka küreklemesi hem goşuldy, bu ýerde türgenler sprintde medal ugrunda bäsleşer.
Makkonnelliň aýtmagyna görä, Olimpiada-2028-de “Pariždäki Olimpiada näçe türgen gatnaşan bolsa, şonça türgen çykyş eder. 10 500”.
Los-Anjelesdäki Olimpiýa oýunlary 2028-nji ýylyň 14 – 30-njy iýulynda geçiriler.
