Gadymy Koreýanyň Kogurýo şalygyna degişli (b. e. öňki 37-668-nji ýyllar) altyn möhür Gonkongda geçirilen auksionda 10,8 million gonkong dollaryna (1,39 million amerikan dollary) satyldy. Soňky baha taryhy gymmatlygyň çak edilýän bahasyndan dokuz esse ýokary boldy diýip, The Korea Times ýazýar.
At şekilindäki saply möhür "Gadymy Aziýa möhürleriniň we bronzalarynyň möhüm şahsy ýygyndylary" atly ýazky satuwyň çäklerinde geçen China Guardian’s Hong Kong 2025 satuwynda görkezildi. Onuň başlangyç bahasy 153 800 dollar bilen 282 100 dollar aralygynda oýnady.
Boýy 2,8 sm we agramy 88 gram bolan bu artefaktyň ýüzüne "Kogurýoly markiz Guýä Szin nesilşalygyndan" diýen ýazgy haşamlanyp ýazylypdyr.
Taryh ylymlary boýunça professor Pak De Çženiň sözlerine görä, bu ýazgy Hytaýyň Szin nesilşalygynyň, megerem, goňşy döwletler bilen gatnaşyklary berkitmek üçin diplomatik strategiýa hökmünde şular ýaly sowgatlary ulanandygyny görkezýär.
"Käbir koreý institutlary bu esere gyzyklanma bildirdiler, ýöne bahasynyň aşa gymmatlygy we onuň hakykydygy ýa-da däldigi bilen bagly soraglar sebäpli, auksiona işjeň gatnaşyp bilmediler" – diýip, Pak gürrüň berdi.
Şeýle hem, artefakt hakyky bolup çykan ýagdaýynda onuň Koreýa bilen Hytaýyň arasyndaky diplomatik gatnaşyklara has gowy düşünmäge kömek etjekdigini sözüniň üstüne goşdy.
