Rocket Lab kompaniýasynyň hünärmenleri geljekki Neutron raketasynyň ikinji basgançagynyň hil synaglarynyň tamamlanandygyny habar berdiler.
Rocket Lab-yň inženerleri raketanyň ikinji basgançagyny ýokary basyşda synagdan geçirmegi, mehaniki ýüklenmeleri hem-de onuň ulgamlarynyň we programma üpjünçiliginiň işleýşini barlamagy öz içine alýan synaglar toplumyny geçirdiler. Basgançak ähli synaglardan üstünlikli geçdi. Neutron-yň ilkinji uçuşy şu ýylyň ikinji ýarymynda bolup biler.
Bölümleýin gaýtadan ulanylmaga ukyply Neutron raketa göterijisi Ýeriň pes orbitasyna 13 tonna çenli ýük çykaryp biler we gurluşy adaty bolmadyk görnüşde bolar. Onuň esasy aýratynlyklary – uçuş wagtynda ikinji basgançagyň birinji basgançagyň içinde ýerleşmegi we açylyp-ýapylýan burun örtügi bilen üpjün edilmegidir.
Uçuşyň degişli tapgyryna ýetilensoň, Neutron-yň birinji basgançagy burun örtügini açyp, ýük bilen bilelikde ikinji basgançagy goýberer, soňra bolsa örtügi ýapyp, indiki uçuş üçin Ýere dolanar.
