Iri awtoulag konsernleri Donald Trampyň administrasiýasy tarapyndan täze söwda nyrhnamalary girizilenden soň, amerikan bazaryndaky işlerine täzeden garap başladylar. Ak tamyň baştutany ähli ýurtlardan gelýän hemme awtoulaglar üçin 25% gümrük töleg nyrhyny girizdi.
Şeýle gümrük nyrhlary kompaniýalara önümçiliklerini Amerikanyň Birleşen Ştatlarynyň özünde guraýmasalar, çäklendirmelere hötde gelmäge mümkinçilik bermeýär. Bu ýagdaý Ýewropanyň esasy awtoulag öndürijilerini strategiýalaryna täzeden garamaga mejbur edýär.
Volkswagen nemes awtoulag öndürijisi nyrhlar kesgitlenenden soň, Meksikadan ABŞ-a demir ýol arkaly iberilýän awtoulaglarynyň üpjünçiligini wagtlaýynça togtatdy we bu kompaniýa Ýewropadan deňiz arkaly gelýän awtoulaglaryny hem portlarda saklar. Bu barada sebitdäki esasy hyzmatdaşlara we dilerlere iberilen resmi hata salgylanýan Automotive News habar berýär.
Konserniň ýolbaşçylygy häzirki wagtda täze strategiýany işläp düzýär. Bahalar syýasatyna täzeden garamak zerur bolup biler.
Niderlandlarly Stellantis awtoulag öndürijisi Meksikadaky we Kanadadaky önümçilik kuwwatlarynyň işini doňdurýar. Kompaniýa ýagdaýy seljerýär we mundan beýläkki görülmeli çäreleri meýilleşdirýär. Şeýle hem, ozal Meksikany we Kanadany bölek şaýlar bilen üpjün edýän ABŞ-daky zawodlardan 900 töweregi işgäriň işden çykarylandygy habar berildi. Mersedes-Benz ABŞ-nyň bazaryndaky modelleriniň sanyny azaltmagy göz öňünde tutýar. Kompaniýa has elýeter awtoulaglar nyrhlar sebäpli bäsdeşlik ukybyny ýitirip biler diýip hasaplaýar. Şol bir wagtyň özünde, bu konserniň ABŞ-da öz zawodlary bar we indi olaryň önümçilik kuwwatyny ýokarlandyrmagy meýilleşdirýär.
