Hyundai Motor Günorta Koreýanyň Seul şäherindäki awtosergisinde wodorod ýangyç elementleri (FCEV) bilen işleýän täze nesil Nexo awtoulagyny tanyşdyrdy. Bu barada «ITHome» portaly habar berýär.
Ulag Steel Art diýlip atlandyrylýan täze dizaýn bilen bezelen – bu stil geçen ýylyň oktýabrynda tanyşdyrylan Initium konsept awtoulagyndan ylham alýar. Täze Nexo-da birinji nesildäki tegelegräk äheňden ýüz öwrülipdir. Öň tarapy dört nokatly LED yşyklar bilen enjamlaşdyrylypdyr.
Salonynda iki sany 12,3 dýuýmlyk ekran, 12 dýuýmlyk proýeksiýa displeýi, şeýle-de 14 sany dinamikaly B&O ses ulgamy bar. Şeýle-de kondisioner üçin aýratyn sensor dolandyryş paneli, iki sany telefon üçin simsiz zarýad beriji enjam we gapdaldaky yzky (bokowoý) aýnalaryň deregine ekranlar bilen üpjün edilen.
Täze Nexo 2,64 kWt·sag akkumulýator we wodorod ýangyç elementli batareýa bilen işleýär. Ol 201 at güýjüni öndürýän hereketlendiriji bilen enjamlaşdyrylan. Awtoulag 100 km/sag tizlige bary-ýogy 7,8 sekuntda ýetýär.
Wodorod saklanýan bakynyň göwrümi 6,33 kg-dan 6,69 kg-a çenli artdyrylypdyr. Bu bolsa bir gezeklik zarýad bilen 700 kilometre çenli ýol geçmäge mümkinçilik berýär. Baky wodorod bilen doldurmak üçin, 5 minutdan hem az wagt gerek.
