ABŞ-nyň Prezidenti Donald Tramp žurnalistlere barly daşary ýurtlulara Ştatlarda hemişelik ýaşamak hukugyny berýän we raýatlygy almak üçin ýol açýan “altyn karty” görkezdi. Kartyň bahasy 5 mln dollar diýip, AFP habar berýär.
Prezident plastik karty prezident uçarynda uçuş wagty KHBS-iň wekillerine görkezdi. Altyn reňkli kartda Trampyň portreti şekillendirilen hem-de The Trump Card ýazgysy bar.
Ak tamyň ýolbaşçysy bu programmanyň ýakyn hepdelerde işe başlajakdygyny habar berdi. Onuň aýtmagyna görä, ol şeýle kartyň ilkinji eýesi boldy.
Bu başlangyç barada Tramp ilkinji gezek 25-nji fewralda aýdypdy. Şol wagt ol programmanyň iki hepdeden başlajakdygyny belledi.
ABŞ-da häzir daşary ýurtly maýadarlara grin-kart almaga mümkinçilik berýän EB-5 programmasy hereket edýär. Munuň üçin bir mln dollar töweregi maýa goýmaly (ýa-da ykdysady taýdan pes zolaklarda 800 müň). Täze programma häzirkiniň üstüni ýetirermi ýa-da ony çalşyrarmy, bu barada administrasiýa anyk maglumat bermedi.
