Hyundai ýaryş wideooýunlaryndan ruhlanan Insteroid şoukaryny hödürledi. Awtomobil agressiw dizaýna we drift režimine eýe boldy diýip, Auto Bild habar berýär.
Insteroid ady Inster (Hyundai-yň täze ykjam krossoweri) we steroid sözlerinden ybarat bolup, modeliň sport aýratynlyklaryna yşarat edýär.
Ulag wirtual awtomobil ýaly görünýär: ol örän inli (2,04 m) bolup, uly howa ýygnaýjylar we tigir arkalarynda wentilýasiýa deşikleri bilen üpjün edilen. Deňeşdirmek üçin, ini 2 metrden gowrak bolan awtomobillere Bentley Continental GT we Aston Martin sportkarlary, şeýle-de Chevrolet Tahoe we Cadillac Escalade ýaly ýolsuz ýerden ýöreýan ulaglar girýär.
Yzynda uly spoýler we gaz çykarýan turbalara meňzeş yşyk diodlary oturdyldy.
Salon minimalistik bolup, berklik üçin turba çarçuwasyna eýe boldy. Interýer mämişi öwüşginler bilen ak-gara reňklerde ýerine ýetirildi. Panelde we gapylarda bezeg materiallary ýok, olar metaldan we plastikden ýasaldy.
Ulagyň tehniki aýratynlyklary häzirlikçe gizlin saklanýar, ýöne Insteroid-iň drift režiminiň we emeli ýaryş sesiniň bardygy belli. Ähtimal, Hyundai bu modeli çäkli tiraž bilen çykarar.
Şoukar Koreýada, Ýewropada, Ýakyn Gündogarda we Aziýa-Ýuwaş umman sebitinde satylýan arzan Hyundai Inster elektrokrossowerine esaslanýar.
