Samsung 2025-nji ýylyň tomsunda Galaxy Unpacked tanyşdyrylyş çäresini geçirer. Şol çärede täze nesil eplenýän smartfonlar – Galaxy Z Flip 7 we Galaxy Z Fold 7 hödürlener. Emma syzdyrylan maglumatlara görä, kompaniýa has elýeterli bahaly eplenýän smartfony – Galaxy Z Flip 7 FE modelini hem çykarmagy meýilleşdirýär.
FE (Fan Edition) – Samsung-yň smartfonlarynyň bir hatary bolup, olar flagman modellere garanyňda birneme ýönekeýräk wersiýa hökmünde hödürlenilýär. Mundan öň FE belgisi diňe S-seriýaly smartfonlarda ulanylýardy. Emma 2025-nji ýylda FE hataryna ilkinji eplenýän smartfon – Galaxy Z Flip 7 FE hem goşular.
Samsung Galaxy Z Flip 7 FE-niň ilkinji ýokary hilli şekil suratlaryny meşhur insaýder OnLeaks paýlaşdy. Onuň syzdyrylan maglumatlary köplenç tassyklanýar. Maglumatlara görä, elýeterli «flip» modeliniň ölçegleri 165,1 x 71,7 x 7,4 mm bolar. Bu ölçegler geçen ýylky Galaxy Z Flip 6-nyňky bilen deňdir.
Galaxy Z Flip 7 FE dizaýny boýunça Galaxy Z Flip 6-nyň nusgasy ýaly. Emma kameralary we prosessory has ýönekeýleşdirilen. Syzdyrylan maglumatlara görä, FE-modeli 4 nm Exynos 2400e çibi bilen işleýär. Galaxy Z Flip 6 modeli Snapdragon 8 Gen 3 prosessory bilen enjamlaşdyrylandyr.
Samsung Galaxy Z Flip 7 FE-niň (syzdyrylan) häsiýetnamasy:
- Esasy ekran: 6,7 dýuým, Dynamic AMOLED, 2640x1080, 426 ppi, 120 Gs
- Goşmaça ekran: 3,4 dýuým, Super AMOLED, 748x720, 120 Gs
- Prosessor: Exynos 2400e
- Ýat: 12/256 GB
- Batareýa: 4000 mA·sag sygymly
- Kameralar: esasy – 50 MP, giň burçly – 12 MP, öňdäki – 10 MP
- Operasion ulgam: Android 15 esasly One UI 7
Galaxy Z Flip 7 FE-niň bahasy entek belli däl. Galaxy Z Flip 6 ABŞ-da 1099 dollardan satylýar. Elbetde, FE-modeli has arzan bolar. Çaklamalara görä, onuň bahasy 799 dollardan geçmez, ýöne bu maglumat heniz resmi taýdan tassyklanmady.