Žan-Mişel Baskiýanyň “Sabado por la Noche” (“Şenbe gijesi”) kartinasy Gonkongda geçirilen auksionda 14,5 million dollara satyldy. Bu barada Christie’s auksion öýi habar berdi. Ol şu ýaz möwsüminde Aziýada satylan iň gymmat eser boldy.
"Bu ajaýyp eseri hödürlemek biziň üçin buýsançly waka boldy. Bu derejedäki eserler bazara çykanda, aziýaly kolleksionerler hemişe olara gyzyklanma bildirýärler" –diýip, auksion öýünde bellediler.
Baskiýa “Şenbe gijesini” 1984-nji ýylda döretdi. Kendiriň ýüzüne akril we ýagly pastel bilen çekilen bu kartina suratkeşiň döredijiliginiň giçki döwrüne degişlidir. Eserde Baskiýanyň döredijiligine mahsus häsiýetler bildirýär: ekspressiw stil, açyk reňkler, gödek çyzyklar, graffiti elementleri we afro-amerikan medeniýetiniň nyşanlary.
Şol bir wagtyň özünde bu eseri suratkeşiň iň gymmat kartinasy bilen hiç bir tarapdan deňeşdirip bolmaýar. Onuň 1982-nji ýylda çekilen “Atsyz” kartinasy Sotheby’s-yň Nýu-Ýorkdaky auksionynda 2017-nji ýylda 110,5 million dollara satyldy. Ony bir ýyl ondan öň Baskiýanyň eserini 57,3 million dollara satyn alan ýapon telekeçisi Ýusaku Maedzawa satyn aldy.
