Kembrij uniwersitetiniň sagadynyň dili tas bir asyrdan soň täzeden ýerine goýuldy. Ony talyplyk ýyllarynda ogurlan atasynyň ýerine, gyzy yzyna gaýtardy diýip, «The Guardian» neşiri habar berýär.
1930-njy ýyllarda Jeffri Hanter Beýker dosty bilen bilelikde bu sagadyň dilini gijäniň ýarynda aýryp, alyp gidipdir. Olar ony kartondan ýasalan nusga bilen çalşyrypdyrlar. Şol wagtlar, ýagny 1934-1937-nji ýyllarda Jeffri Gonwil-end-Kiz kolležinde okaýan eken.
Sagadyň diliniň ýitendigi mälim bolansoň, uniwersitetiň ýolbaşçylary ony täzesi bilen çalşyrypdyrlar. Ýöne ony alanlaryň kimdigi näbelli bolup galypdyr. Jeffri 1999-njy ýylda 83 ýaşyndaka aradan çykýar. Ol aradan çykansoň, taýajyk gyzy Triksi Beýkere geçýär.
Yzyna gaýtarylyp berlen taýajyk, beýleki talyplaryň degişmeleriniň köp sanly subutnamalarynyň saklanýan arhiwine ýerleşdirildi.
«Talyplaryň degişmelerini öwrenmek – kolležiň uzak we öwüşginli taryhynyň bir bölegidir. Elbetde, biz talyplaryň beýle oýunlara gatnaşmagyny goldamaýarys, ýöne ýyllar geçensoň, hiç kime zyýan ýetirilmändigini, düzedip bolmajak zeperiň ýetmändigini, şeýle hem olaryň okuwyny tamamlandygyny bilmek meni begendirýär» — diýip, Kembrijiň arhiwçisi Jeýms Koks aýtdy.
