Hindistanyň Kettaýýa obasynda Bhima lakamly pitbul tohumly güjük çagalary we işçileri kepjebaşdan halas edip, özi heläk bolupdyr. Gaýduwsyz it baradaky wakany Deccan Herald neşiri gürrüň berdi.
Çeşmäniň berýän habaryna görä, uzynlygy 3,6 metrden gowrak bolan kepjebaş çagalaryň oýnap ýören öýüne golaýlapdyr. Ol kokos agajynyň ýanynda gizlenipdir. Ýylany ilki bilen itler görüpdir. Bhimanyň eýesi Şamant şeýle hem doberman tohumly yzçy itini hem saklaýan eken. Itleriň ikisi-de üýrüp başlapdyr we dessine howply süýrenijiniň daşyny gabapdyr.
Garpyşyk, takmynan, 15 minut dowam edipdir. Netijede itler kepjebaşy parçalapdyrlar. Emma mundan öň ýylan Bhimanyň tumşugyndan dişläp ýetişen eken. It heläk bolupdyr.
Şamant we onuň maşgalasy itini ýitirenlerine gynanýarlar. Ýerli ýaşaýjylaryň sözlerine görä, çagalar we işçiler diňe itleriň hüşgärligi netijesinde diri galypdyrlar.
Şa kepjebaşy dünýäde iň zäherli ýylanlaryň biri hasaplanýar. Onuň ýeke gezek dişlemegi pili ýa-da 20 adamy heläklemek üçin ýeterlikdir. Zäher beýniniň dem alyş merkezine täsir edip, ýürek ýetmezçiligine we dem alyş ýollarynyň tutulmagyna sebäp bolýar. Bu ýylanlar 5,5 metre çenli ösýär. Olar bedeniniň üçden bir bölegini ýerden galdyryp, hüjüme geçmezden ozal, ör boýuna galyp duran adamyň gözüniň deňinde diýen ýaly durup bilýärler.
Bu ýylanlar adatça gorkak bolýar we adamlardan gaça durmaga çalyşýarlar.
