Germaniýanyň Porsche kompaniýasy duýduryş nyşanlaryny gönüden-göni kapotda we bagaž ýeriniň gapysynda görkezmäge mümkinçilik berýän awtomobiller üçin tehnologiýany döretdi. Ol eýýäm Bütindünýä intellektual eýeçilik guramasynda (WIPO) patentlendi.
Patente görä, dinamiki ekranlar ýol ýagdaýy barada maglumatlary görkezer. Mysal üçin, ulag döwlen ýagdaýynda mejbury durmak nyşany ýanar, ýol-ulag hadysasynda tiz kömegi çagyrmak ýüzlenmesi bilen habar peýda bolar. Eger öňde dyknyşyk bar bolsa, “Dyknyşyk” nyşany görkeziler.
Ekranlarda “Meniň ýagdaýym gowy” ýa-da “Kömek gerek” ýaly tekst habarlary, şeýle-de “Ýabany haýwanlar”, “Çarkandak ýol” ýaly ýol nyşanlaryny görkezip biler. Ýagdaý baradaky maglumatlary awtomobil lidarlardan we nawigatordan alar.
Kuzowyň üstüni reňkli pigmentli mikrokapsulalar bilen örtmek meýilleşdirilýär. Toguň täsiri astynda bölejikler reňkini üýtgedip, şekil emele getirer. Tehnologiýa E-ink ekranlarynyň reňk grafikaly analogy diýlip atlandyrylýar.
Kompaniýa önümçiligiň gymmat boljakdygyny belleýär. Şonuň üçin patentiň alynmagy Porsche-niň bu tehnologiýany geljekde has gowy netijeleri gazanmak üçin ulanjakdygyny kepillendirmeýär.
