Ford kompaniýasy 10 tizlikli 10R awtomatiki geçiriş korobkasynda kemçilikleriň ýüze çykyp bilmek ähtimallygy sebäpli 2024-nji we 2025-nji ýylyň modellerini yzyna çagyrýandygyny mälim etdi. Bu barada Autoevolution habar berýär.
Mesele yza geçirişiň işlemezligine sebäp bolup biljek esasy dolandyryş klapan korpusynyň nädogry işlenmegi bilen baglanyşykly. Käbir ýagdaýlarda R režimi saýlananda ulagyň garaşylmadyk ýerden hereket edip başlamak howpy bar.
Yza çagyryş alty modele degişli: Ford Bronco, F-150, Mustang, Ranger, Explorer we Lincoln Aviator. Näsazlygyň ilkinji alamatlary ýanwar aýynda Mustang gurnama hatarynda tapyldy we soňra bu ýene bäş kepillik ýagdaýynda tassyk boldy. Ford şübheli komponentleri bolan ulaglaryň satuwyny wagtlaýynça togtatdy.
Kemçilikli korobkalar Miçigandaky Livonia Transmission Plant zawodynda öndürildi. Awtoulaglaryň eýelerine kemçilikli bölek şaýlary mugt çalşyp bermek wada berilýär. Habarnamalar 2025-nji ýylyň 5-nji maýynda iberilip başlar.
Kompaniýanyň berýän maglumatlaryna görä, bu mesele bilen baglanyşykly ýol-ulag heläkçiligi ýa-da şikes ýetme hasaba alynmady. Muňa garamazdan, Ford töwekgelçilik etmek islemeýär we yzyna çagyryş kampaniýasyna başlady. Bu korobka barada sürüjilerden öň hem arz-şikaýatlar gelipdi.
