Kriştianu Ronaldu yzygider 22 ýyl milli ýygyndy üçin gol geçiren ilkinji futbolçy boldy. Bu barada Stats Foot habar berýär.
23-nji martda Lissabonda Milletler ligasynyň 1/4 finalynyň Portugaliýa bilen Daniýanyň milli ýygyndylarynyň arasynda jogap oýny geçirildi. Portugaliýa goşmaça wagtda 5:2 hasabynda ýeňiş gazanmagy başardy. Ilkinji duşuşyk Daniýanyň peýdasyna tamamlanypdy – 1:0.
Bu ýeňiş Portugaliýany ýaryşyň ýarym finalyna çykardy. Ol bu ýerde Germaniýa bilen duşuşar.
Ýeňşe “Al-Nasryň” 40 ýaşly hüjümçisi hem öz goşandyny goşdy. Ronaldu gol bilen tapawutlandy we bu onuň karýerasynda 929-njy, Portugaliýanyň milli ýygyndysy üçin bolsa 136-njy goly boldy. Klub derejesinde onuň 793 goly bar.
Ronaldu milli topar üçin gol sany boýunça dünýäde birinji orny eýeleýär. Ikinji orunda Argentinanyň milli ýygyndysy üçin 112 gol geçiren Lionel Messi gelýär.
