Sekiz aýlyk güjük Kadabomb Okami dünýäde iň gymmat it boldy – ol 5,7 mln dollara satyldy. Bu it ýabany möjek bilen kawkaz owçarkasynyň çaknyşdyrylmagy arkaly döredilen seýrek tohuma degişli diýip, The New York Post ýazýar.
Satuw wagty Kadabomb Okaminiň agramy 75 kilogram we boýy 76 santimetrdi.
Iti Bangalordan (Hindistan) 51 ýaşly zawod eýesi Satiş satyn aldy. Onuň eýýäm 150-den gowrak dürli tohumdan itleri bar. Ol indi itleri köpeltmeýär-de, bütin dünýä boýunça seýrek tohumlary gözläp, olary Hindistanda görkezýär. Şeýle biznes oňa ýarym sagatda 2 800 dollardan bäş sagatda 11 700 dollara çenli girdeji getirýär.
“Men bu güjük üçin 50 mln rupiýa sarp etdim, sebäbi men itleri gowy görýärin. Maňa iň üýtgeşik tohumlaryň eýesi bolmak we olary Hindistan bilen tanyşdyrmak ýaraýar. Men bu tohumlara şeýle köp pul sarp etdim, sebäbi olar seýrek, adamlar bolsa olara seretmegi we olar bilen surata düşmegi halaýar. Men we meniň itlerim gyzyl ýodadaky islendik aktýordan has köp ünsi çekýär” – diýip, Satiş belledi.
Itler ýedi akr meýdanly fermada ýaşaýar we bu ýerde olaryň her biriniň öz otagy bar. Olara alty adam gözegçilik edip, itleri ähli zerur zatlar bilen üpjün edýär.
