Xiaomi dördünji çärýek we tutuş 2024-nji ýyl üçin maliýe netijeleri barada habar berdi. Geçen ýylyň jemi boýunça kompaniýa 365,9 mlrd ýuan ($50,5 mlrd) möçberde girdeji gazandy. Bu hem kompaniýa üçin rekord görkeziji boldy. Ýyllyk girdeji 2023-nji ýyl bilen deňeşdirilende 35% ýokarlandy. Muňa kompaniýanyň smartfonlar, elektromobiller, IoT we internet hyzmatlary ýaly ugurlarda üstünlik gazanmagy ýardam etdi.
Xiaomi-niň 2024-nji ýylda düzedilen arassa girdejisi geçen ýyl bilen deňeşdirilende 41,3% ýokarlanyp, 27,2 mlrd ýuan ($3,7 mlrd) boldy. Kompaniýanyň dördünji çärýekde gazanan girdejisi 2023-nji ýylyň degişli döwri bilen deňeşdirilende 48,8% ýokarlanyp, ilkinji gezek 109 mlrd ýuana ($15 mlrd) ýetdi.
Kompaniýanyň smartfon satuwyndan gazanan ýyllyk girdejisi 191,8 mlrd ýuan ($26,5 mlrd) boldy, bu umumy girdejiniň, takmynan, 52%-ine deňdir. Hasabat döwründe kompaniýa bütin dünýäde 169 mln smartfon satyp, 56 ýurduň bazarlarynda iň uly üpjün edijileriň üçlügine we 13 ýurtda öňdebaryjylaryň bäşligine girdi.
Xiaomi-niň ekoulgamynda 700 mln aýlyk işjeň ulanyjy bolup, şolardan 170 mln ulanyjy içerki bazaryň paýyna düşýär. Bu mukdar kompaniýanyň smartfonlaryny ulanyjylary, şeýle-de akylly öý enjamlarynyň, dakylýan elektronikanyň we elektromobilleriň eýelerini öz içine alýar.
Hasabata görä, kompaniýa 2024-nji ýylda 136 854 elektromobil satdy. Kompaniýa özüniň 200 000-nji awtomobilini bir ýyldan az wagtyň içinde çykarandan soň, 2025-nji ýyl üçin üpjünçilik maksady 350 müň elektromobile çenli artdyryldy.
Şeýle-de, hasabatda kompaniýanyň ylmy gözleg bölümçesinde 21 190 adamyň bardygy görkezilýär. Geçen ýyl ylmy gözlegler we işläp taýýarlamalar üçin maýa goýum möçberi 24,1 mlrd ýuan ($3,3 mlrd) boldy. 2025-nji ýylda kompaniýa bu ugurlara çykdajylary 30 mlrd ýuana ($4,15 mlrd) ýetirmegi meýilleşdirýär.
