Britaniýanyň Ekseter şäherinde geçirilen Bearnes Hampton Littlewood auksionynda “milliarddan biri” diýlip atlandyrylýan üýtgeşik şar şekilli towuk ýumurtgasy 420 funt sterlinge (takmynan, 544 dollar) satyldy. Bu barada Bi-bi-si habar berýär.
Şeýle togalak ýumurtgany geçen ýylyň dekabr aýynda Fenton fermasynda işleýän Elison Grin atly bir aýal tapdy. Ol “Independent” bilen söhbetdeşlikde şeýle şekilli ýumurtgany ozal görmändigini we ýumurtganyň, aslynda, togalak bolup biljekdigi barada pikir etmändigini aýtdy.
57 ýaşly Grin bu fermada eýýäm üç ýyl bäri işleýär we her gün 30 müň töweregi ýumurtgany elden geçirýär.
Ol şular ýaly başga bir ýumurtganyň Angliýadaky auksionda 200 funt sterlinge satylandygyny bilenden soň, öz başlygyndan bu ýumurtgany auksiona çykarmaga rugsat sorady.
“Hemmeler baha berip başlanlarynda, bu çagalarymyň birine sport ýaryşynda tomaşa edýänim ýaly boldy. Bu örän ajaýyp” – diýip, aýal auksion barada aýdýar.
Ýumurtgadan alnan serişdeler, Griniň isleýşi ýaly, haýyr-sahawat guramasyna gönükdiriler. Alyjynyň ady mälim edilmeýär.
