Beýik Britaniýada «Joby Aviation» awiasion kompaniýasy tarapyndan işlenip taýýarlanan eVTOL görnüşli elektrik aerotaksiler 2026-njy ýyla çenli «Virgin Atlantic» aerokompaniýasynyň ekoulgamyna goşular we işe giriziler. Bu taksiler howa menzillerinden şäherleriň merkezlerine çenli ýolagçylary gysga wagtda gatnatmaga mümkinçilik berer. Meselem, Hitrou howa menzilinden Keneri-Uorf işewürlik etrabyna çenli 80 minutda däl-de, bary-ýogy 8 minutda aşyp bolar diýip, «The Verge» neşiri habar berýär.
Işe giriziljek aerotaksiler elektrik hereketlendirijiler bilen işleýärler. Şol sebäpdenem olar ne ses döredýärler, ne-de zyýanly gazlary bölüp çykarýarlar. Olar bir gezeklik zarýad bilen 160 km ýol geçýär we iň ýokary tizligi 320 km/sag-e ýetýär. Bu görkezijiler ýolagçylary diňe şäheriň içinde däl-de, eýsem şäherden-şähere hem tiz wagtda gatnatmak üçin mümkinçilikleriň öňüni açýar. Aerotaksileriň işe girizilmegi bilen, ýolagçylar orunlary Virgin Atlantic-iň ykjam goşundysy arkaly bronlap bilerler.
2026-njy ýyla çenli uçuşlaryň bahalary ýokary hilli ulag paýlaşyk (premium carsharing) hyzmatlaryndaky bahalar bilen deňleşer. Sebäbi aerotaksiler üçin meýdançalaryň sany artdyrylar. Bu taslamany «Delta Air Lines» amerikan awiakompaniýasy hem goldaýar. Olar eVTOL infrastrukturasyny ABŞ-da ornaşdyrmak üçin hem işleri alyp barýarlar. Bilermenleriň çaklamalaryna görä, 2030-njy ýyla çenli aerotaksiler megalopolislerde (uly şäherlerde) adaty ulag serişdesine öwrüler. Olar ýol hereketlerindäki dyknyşyklygy ýeňleder we «çalt syýahat» düşünjesini täzeden kesgitlär.
