Telegramyň aýlyk işjeň ulanyjysy bir milliarddan geçdi diýip, messenjeriň esaslandyryjysy Pawel Durow habar berdi.
Onuň sözlerine görä, Telegram dünýäde habar alyşmagyň iň meşhur programmasy boldy (Hytaýyň WeChat-yndan başga).
Telegramdan öň birinji orunda WhatsApp durýar, Durow ony öz messenjeriniň “arzan” we “ýuwan” imitasiýasy diýip at berdi.
“Ençeme ýyllaryň dowamynda olar bizi haýallatmak üçin, lobbi we PR kampaniýalaryna milliardlarça dollar sowrup, täzeliklerimizi göçürmäge synanyşdylar. Olar şowsuzlyga uçradylar. Telegram ösdi, girdejili kanala öwrüldi we bäsdeşimizden tapawutlylykda garaşsyzlygyny saklady" diýip, Durow ýazýar.
Şeýle hem, Durowyň ýazyşy ýaly, ulanyjylaryň gatnaşygy-da artýar. Orta hasap bilen her bir ulanyjynyň Telegramy günde 21 gezek açýandygyny we oňa her gün 41 minutyny sarp edýändigini belleýär. Durowyň sözlerine görä, 2024-nji ýylda girdeji 547 million dollar boldy.
2024-nji ýylyň aprelinde Durow amerikaly žurnalist Taker Karlsona bir ýylyň içinde milliard ulanyja garaşýandygyny aýdypdy. “Häzirki wagtda 900 million ulanyjysy bolan Telegramda gaty gowy işlenilýär diýip hasaplaýaryn. Ýene bir ýyldan aýdaky işjeň ulanyjylarymyzyň sanynyň bir milliarddan geçmegi gaty ähtimal "-diýip, messenjeriň esaslandyryjysy nygtady.
Durow 2024-nji ýylyň dekabrynda Telegramyň ýylyň dowamyndaky umumy girdejisiniň milliard dollardan geçendigini ýazdy. Onuň sözlerine görä, 2022-nji ýylda peýda bolan tölegli Telegram Premium hyzmatyna ýazylan abonentleriň sany 12 milliondan geçdi we mahabatdan gelýän girdejisi “birnäçe esse artdy”.
