Awtomatizirleme, emeli aň we ekologiki geçiş global zähmet bazarynyň gurluşyny üýtgeder. Bu barada materialy Forbes neşir etdi.
Hünärmenler käbir pudaklarda işden çykarylmalar artsa, beýlekilerde işgärlere bolan isleg barha artar diýip hasaplaýar. Bütindünýä ykdysady forumynyň çaklamalaryna görä, 2030-njy ýyla çenli dünýä ykdysadyýeti 92 mln töweregi iş ornuny ýitirer, şol bir wagtyň özünde 170 mln täze iş ornunyň döredilmegine garaşylýar.
Geljek 5 ýylda boş iş orunlarynyň tehnologiýa pudagynda, maglumat seljermesinde, energetikada we lukmançylykda has köpelmegine garaşylýar.
Çaklamalara görä, has uly iş ösüşiniň boljak ugurlary şulardan ybarat:
- ·Programma üpjünçiligini we ykjam goşundylary işläp düzüjiler (+57%)
- ·Kiberhowpsuzlygy dolandyrmak boýunça hünärmenler (+53%)
- ·Maglumatlary saklamak we seljermek boýunça hünärmenler (+49%)
- ·Awtonom we elektrik ulag boýunça inženerler (+48%)
- ·UI/UX dizaýnerleri (+48%)
- ·Ýeňil ýük ulaglarynyň sürüjileri we kurýerler (+46%)
- ·Zatlaryň interneti boýunça hünärmenler (+42%)
- ·Maglumat analitikleri we ylmy gözlegçiler (+41%)
Kiberhowpsuzlyga we maglumat dolandyryşyna aýratyn üns bermek gerek, sebäbi maglumatlaryň göwrüminiň artmagy haker hüjümleriniň howpuny ýokarlandyrýar. Gaýtadan dikeldilýän energiýa çeşmeleri hem bu pudakda iş orunlarynyň sanynyň artmagyna ýardam eder.
Ýitmek ýa-da ep-esli azalmak howpunyň astynda bolan kärler:
- ·Poçta işgärleri (-34%)
- ·Kassirler we bank işgärleri (-31%)
- ·Maglumat girizme operatorlary (-26%)
- ·Administratiw we ýerine ýetiriji kömekçiler (-20%)
- ·Tipografiýa işgärleri (-20%)
- ·Buhgalterler we zähmet haklaryny hasaplamak boýunça hünärmenler (-18%)
- ·Ammar işgärleri we maddy gymmatlyklaryň hasaby (-16%)
- ·Gazet paýlaýjylar we köçe satyjylary (-14%)
Adaty pudaklarda, aýratynam, bank we söwda ugurlaryndaky kärler awtomatizirleme we emeli aňyň ornaşdyrylmagy sebäpli ýiter. Geljek 3-5 ýylda täze tehnologiýalaryň netijesinde banklar 200 müňe çenli işgäri azaldyp biler.
Bu özgertmelere nähili taýýarlyk görmeli? Bäsdeşlige ukyplylygy saklamak üçin maglumat seljermesi, emeli aň we kiberhowpsuzlyk başarnyklaryny ösdürmek hem-de täze sanly gurallary we tehnologiýalary özleşdirmek möhümdir.
