Google amerikan kompaniýasy Nowruz baýramyna ýörite dudl bagyşlady. Ol suratkeş Pendar Ýusefi tarapyndan döredildi.
Dudl – bu Google tarapyndan möhüm wakalar mynasybetli döredilýän we gözleg ulgamynyň baş sahypasynda ýerleşdirilýän ýörite suratlar.
2025 Novruz Bayramı atly dudlda baýramçylygyň nyşanlary – ýazyň gelendigini alamatlandyrýan semeni, gülleýän agaçlar we garlawaçlar şekillendirilýär. Şeýle-de, suratlarda Merkezi Aziýa halklarynyň däp bolan eşiklerini ýada salýan milli lybasly personažlar, aýratynam, L harpynda reňki boýunça gyzyl türkmen donuny ýada salýan köýnegi hem-de goýun derisinden tikilen ak telpegi geýen ýigit bar.
“Bahar baýramynyň ýaşy 3000 ýyldan gowrak diýlip hasaplanylýar, başlangyjyny Eýrandan (şol wagt Parsystan) alyp gaýdýar we häzirki günde dünýäniň köp ýurtlarynda bellenilýär” – diýip, Google Doodles-yň sahypasynda aýdylýar.
Şeýle-de, habarda bu baýramçylykda “öýde doly arassaçylyk işlerini geçirmegiň, ýumurtga bezemegiň we geçen ýylyň oňyn däl energiýasyndan arassalanmak we geljek üçin ýaşaýyş güýjüni çekmek üçin otdan böküşi guramagyň” adatdygy bellenilýär.
Nowruz baýramyny Eýranda, Merkezi Aziýada, Owganystanda, Azerbaýjanda, Kawkazda, Türkiýede we Günorta Aziýada 300 mln töweregi adam belleýär. 2009-njy ýylyň 30-njy sentýabrynda baýramçylyk ÝUNESKO-nyň maddy däl medeni mirasynyň sanawyna girizildi.
