Redmi brendi çagalar üçin niýetlenen ilkinji akylly sagadyny hödürledi. Täze sagadyň korpusy açyk reňkli, berk we suw geçirmeýär. Enjam dürli görnüşdäki sanly ekranlary goldaýar. Onda wideojaň üçin ýörite kamera we çaganyň nirededigini anyklamak funksiýasy bar diýip, «Gizmochina» habar berýär.
Sagadyň 1,68 dýuýmlyk, 360×390 piksel durulykdaky uly ekrany bar. Onuň ýokarsynda ýerleşýän 5 MP kamerasy wideojaň arkaly ene-atalara çagalary bilen hemişe aragatnaşyk saklamaga mümkinçilik berýär. Aragatnaşyk üçin 4G moduly bar, GPS, Beidou we Wi-Fi arkaly 9 derejeli lokasiýa gözegçiligini amala aşyryp bolýar. Ene-atalar çagalar üçin «howpsuz zolaklary» kesgitläp bilýärler we şol ýerden çykanlarynda bildiriş alyp bilýärler. Çaganyň nirede gezendigi baradaky maglumatlar 90 gün saklanýar.
«Sapaklar» atly ýörite tertip sagadyň üns sowujy ähli funksiýalaryny bloklaýar. Şeýle hem sagat çagalar üçin niýetlenen WeChat programmasyny goldaýar. Ondaky ähli maglumatlar AES256 şifrleme arkaly goralýar. Sagat fiziki işjeňligi hem yzarlap bilýär.
950 mA·sag sygymly batareýasy enjamy zarýada goýmazdan, üç güne çenli arkaýyn ulanmaga mümkinçilik berýär. Sagadyň korpusy suw geçirmeýär, şeýle-de ol 20 metre çenli çuňlukdaky suwa çümdürilmäge çydamly.
Täze sagat 24-nji martda satuwa çykarylar. Bahasy: 499 ýuan (takmynan, 69 dollar).
