Öň dünýäde iň betnyşan jandar diýlip ykrar edilen damja balyk indi Täze Zelandiýada ýylyň balygy adyna eýe boldy. Ol bu tituly Mountains to Sea tebigaty goraýyş gaznasy tarapyndan gurnalan bäsleşikde aldy diýip, The Guardian habar berýär.
Bäsleşik 2020-nji ýyldan bäri geçirilýär. Şu ýyl guramaçylar rekord mukdarda – 5583 sany arza kabul etdi.
Damja balyk (Psychrolutes marcidus) 1286 ses gazandy. Ol atlantik uly kelleden (Orange roughy) 300 ses öňe geçdi. Üçünji orny uzyn ýüzgüçli derýa ýylanbalygy (Anguilla mossambica) eýeledi.
Beýleki bäsdeşleriň hatarynda kiçi deňiz aty, seýrek bökýän balyk, akula we skatlar bardy.
Damja balyk on ýyldan gowrak wagt öň Täze Zelandiýanyň gözleg gämisiniň bortunda düşürilen suratdan soň belli boldy. Soňrak ol köp sanly internet memleriniň gahrymanyna öwrüldi. 2013-nji ýylda damja balyk dünýäde “iň betnyşan jandar” diýlip atlandyryldy.Ol Ýuwaş, Atlantik we Hindi ummanlarynda, Täze Zelandiýanyň we Awstraliýanyň kenarlarynda ýaşaýar.
Bu balygyň ýüzüş haltasy, doly derejeli skeleti, myşsalary ýa-da teňňeleri ýok. Munuň deregine onuň bedeni suwdan dykyzlygy pes bolan žele dokumadan ybarat, bu hem oňa deňiz düýbüniň üstünde gaýmaga mümkinçilik berýär.
Bu görnüş 130 ýyl ýaşap bilýär diýlip hasaplanylýar.
“Ol awy has golaý gelip, tä agzyna girýänçä diýen ýaly oturýar we garaşýar. Mundan başga-da, bu balyk – wepaly ene-ata: ene balyk bir höwürtgä 100 000-e çenli işbil taşlaýar we olardan balyjaklar çykýança goraýar” – diýip, tebigaty goraýyş gaznasynyň wekili Konrad Kurtua aýtdy.
Hünärmeniň bellemegine görä, suwuň basyşy bilen damja balyk, pökgi bolsa-da, adaty keşbe eýe bolýar, ýöne suwuň ýüzünde ol “şowsuz lukmançylyk tejribeleri” ýaly görünýär.
