Xiaomi kompaniýasy örän arzan bahaly täze smartfonyny – Redmi A5 4G modelini tanyşdyrdy. Bu barada «Gizmochina» neşiri habar berýär.
Smartfon 6,88 dýuýmlyk, 720p durulykdaky we 120 Gs täzeleniş ýygylykly displeý (OLED däl) bilen enjamlaşdyrylan. Enjam Unisoc T7250 prosessory bilen işleýär. Bu iň kuwwatly çipset bolmasa-da, AnTuTu synaglarynda, takmynan, 300 müň bal gazandy. Şol bir wagtyň özünde, bu görkeziji häzirki wagtda giňden ulanylýan Helio G81/G88/G91 we olara meňzeş prosessorlardan has ýokarydyr.
Telefon 4GB/6 GB operatiw ýat (RAM) hem-de 64GB/128 GB içerki ýat (ROM) bilen hödürlenýär.
Beýleki aýratynlyklarynyň arasynda 32 MP esasy kamerasy, arzan smartfonlarda seýrek duş gelýän gradient reňkli yzky paneli, 5200 mA·sag sygymly batareýasy we 18 Wt zarýad beriş goldawy bar.
Enjamyň bahalary häzirlikçe mälim edilmese-de, şeýleräk bolmagyna garaşylýar: 4/64 GB görnüşi – 90 dollar, 6/128 GB görnüşi – 105 dollar.
Şeýle-de täze smartfonyň haýsy ýurtlarda satuwa çykjakdygy barada hem häzirlikçe anyk maglumat ýok.
