BMW kompaniýasy ABŞ-nyň prezidenti Donald Tramp tarapyndan girizilen eksport paçlarynyň konserne şu ýylyň jemleri boýunça 1 milliard ýewro zyýan ýetirjekdigini duýdurdy diýip, «The Times» neşiri habar berýär.
Konserniň baş direktory Oliwer Sipse bu sanlaryň çaklanylýan iň pes görkezijilerdigini aýtdy. Emma BMW-niň ýolbaşçylary girizilen ähli paçlaryň tutuş ýyl dowam etmegine garaşmaýandyklaryny belläp geçdiler.
Bilermenleriň pikirine görä, BMW diňe bir ABŞ-nyň paçlaryndan däl, eýsem beýleki ýurtlaryň muňa jogap hökmünde görjek çärelerinden hem zyýan çekip biler. Belläp geçsek, BMW-niň ABŞ-daky zawodlarynda öndürilýän ulaglaryň tas ýarysy diýen ýaly Germaniýa, Hytaýa, Kanada we Beýik Britaniýa eksport edilýär.
