Prezident Serdar Berdimuhamedow Demirgazyk Makedoniýa Respublikasynyň Prezidenti hanym Gordana Silýanowskaýa-Dawkowa ýurduň Koçani şäherinde bolup geçen ýangynyň adam pidalaryna we şikes ýetmelere getirendigi zerarly gynanç hatyny iberdi diýip, TDH habar berýär.
Döwlet Baştutany şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
Koçani şäherinde bolup geçen ýangyn ýekşenbe gününe geçilýän gije Pulse klubunda ýerli wagt bilen 2:30-da boldy. Şol wagt bu klubda ýerli meşhur DNK topary çykyş edýärdi. Konserte 500 töweregi adam ýygnanypdyr. Ýangynyň sebäbi hökmünde, deslapky maglumatlara görä, pirotehnika serişdeleriniň ulanylmagy hasaplanylýar.
Ýangynyň pidalarynyň sany 59 adama ýetdi, 160-dan gowrak adam şikes aldy, 45-si agyr ýaralandy. Olaryň aglabasy goňşy Bolgariýanyň, Gresiýanyň, Serbiýanyň we Türkiýäniň hassahanalaryna iberildi.
Koçani şäheri 25 müň ilatly, paýtagt şäher Skopýeden 100 km gündogarda ýerleşýär.
