Porsche ýeňil karbon çarçuwaly we Shimano EP801 hereketlendirijisi bilen eBike Sport 2025 elektrowelosipedini çykardy. Ol Demirgazyk Amerikada we Ýewropada 10,920 dollara satylýar.
Bu kompaniýanyň elektrowelosipediniň eýýäm bäşinji nesli bolup, ol ýeňil ýollar we şäher ýollary üçin niýetlenendir. Model Rotwild bilen bilelikde işlenip düzüldi. Dizaýnyny bolsa Studio F. A. Porsche taýýarlady.
Welosiped agramy bary-ýogy 21,6 kg bolan karbon çarçuwasyna we 12 tizlikli Shimano ulgamyna eýe boldy. Shimano EP801 hereketlendirijisi beýiklikden aňsatlyk bilen geçmäge we tizligi artdyrmaga kömek edýär. Akkumulýatorlar sygymy boýunça üýtgeýär: S ölçeg üçin 504 Wt/sag, M we L üçin 630 Wt/sag. Tygşytly režimde geçilýän menzil 175 km ýetýär.
Täzelenmeleriň arasynda öňdäki Fox Float 34 Performance Elite asgyjy we yzky Fox Float DPS amortizatory, şeýle-de takyk dolandyryş üçin täze rul bar. Supernova Starstream X Pro faralary we yzky Topeak BeSeen çyrasy garaňkyda görmäge mümkinçilik berýär. Tizlik we zarýad baradaky maglumatlar Shimano SC-EM800 displeýinde ýa-da Shimano E-Tube Ride programmasynda görünýär.
ABŞ-da M we L ölçegleri, Ýewropada S, M we L ölçegleri elýeterli. Ony Porsche Design onlaýn dükanynda ýa-da Porsche dilerlerinde satyn almak bolýar.
