Peruwly 61 ýaşly balykçy Maksimo Napa Kastro Ýuwaş ummanynda 95 günläp ýekelikde galanyndan soň halas edildi. Bu waka barada Peruwyň «Andina» agentligine salgylanyp, «CNN» neşiri habar berýär.
Napa Kastro 7-nji dekabrda Peruwyň günortasyndaky Markona şäherinden gaýyk bilen ummana çykýar we ýitirim bolýar. Emma soň onuň ýaramaz howa sebäpli ugruny ýitirip azaşandygy we açyk ummanda ýüzüp gezendigi ýüze çykarylýar. Ony 11-nji martda Ekwadordan gelýän balykçylyk gämisi tapýar.
Halas edilenden soň Napa Kastro diri galmak üçin ýagyş suwuny ýygnandygyny, şeýle-de tutup bilen mör-möjeklerini, guşlaryny we pyşbagalaryny iýendigini gürrüň berdi. Şeýle-de bolsa, ol soňky 15 günüň dowamynda hiç zat iýip bilmändir. Tapyp halas edenlerinde ol diýseň hor eken, suwsuzlykdan ejir çekýärdi we ýagdaýy agyrdy.
Balykçy maşgalasy baradaky pikirleriň ony diri galmak üçin höweslendirendigini aýtdy.
«Özüme, men ejem üçin diri galmaly diýip aýtdym. Meniň heniz birnäçe aýlyk agtygym bar ahyryn, men şolar üçin ýaşamaly. Her gün ejem hakda pikir edýädim» — diýip, Napa Kastro ýerli metbugata gürrüň berdi.
«CNN» neşiriniň bellemegine görä, balykçynyň garyndaşlary we dostlary ony üç aýlap gözlemeklerini bes etmändirler. Napa Kastronyň gyzy 3-nji martda Facebook sahypasynda kakasyny gözlemek ugrundaky tagallalary barada ýazyp, onuň diridigine umyt bildirendigini aýdypdyr. Napa Kastro halas edilenden soň, gyzy «Ekwadordaky doganlaryna» kakasyny halas edendikleri üçin çuňňur minnetdarlyk bildirdi.
