ADATA kompaniýasy daşky gaty SSD maglumat göterijisi SC730-y mälim etdi. Öndürijiniň aýtmagyna görä, ol dünýäde iň ykjam göterijidir.
Gurluşyň uzynlygy 36 mm, agramy – bary-ýogy 7,8 g. Daşky görnüşi boýunça ol fleşkany ýada salýar, ýöne iş tizligi boýunça ondan öňe geçýär.
SSD geçirijilik ukyby 10 Gbit/s bolan USB-C ýa-da USB-A (3.2 Gen 2 wersiýa) interfeýsi bilen üpjün edildi. Yzygiderli okaýyş we ýazgy tizligi 600 MB/s ýetýär. Gurluş +5-den +35°C çenli temperaturalarda işleýär.
ADATA SC730 göterijisi Windows 10 we 11, macOS 13 we ondan ýokary, Android 13 we has täze, Linux 6 we has täze ulgamlar bilen gabat gelýär. Şeýle-de, ol iPhone 15 we 16 hatarlaryny, oýun konsollaryny goldaýar.
Maglumat göterijisiniň korpusy barmak yzynyň galmagyna durnukly bolan polimer plastiginden ýerine ýetirildi. Satuwda 512 GB we 1 TB wersiýalary elýeterli bolar. Öndüriji 5 ýyl çäklendirilen kepillik berýär.
SSD-niň bahasy we satuwyň başlanjak senesi heniz yglan edilmedi.
