Öňümizdäki hepde geçiriljek GDC oýun işläp düzüjiler konferensiýasynyň öňüsyrasynda Google kompaniýasy, eger-de işläp düzüjiler garşy çykmasa, ähli Android mobil oýunlarynyň Google Play Games hyzmaty arkaly kompýuterler üçin elýeterli boljakdygyny mälim etdi diýip, «The Verge» neşiri habar berýär.
Google Play Games hyzmaty ilkinji gezek 2022-nji ýylda beta görnüşinde işe girizildi we Android oýunlaryny kompýuterde oýnamak mümkinçiligini hödürläp başlady. Şondan bäri Google yzygiderli bu platformanyň mümkinçiliklerini giňeldip, hyzmaty has-da kämilleşdirip gelýär.
Şeýle-de kompaniýa kompýuterlerde oýnamak üçin elýeterli bolan mobil oýunlary belgilemek üçin täze «oýnap bolarlyk nyşanlaryny» (playability badge) hödürledi. Google Play-iň oýunlar boýunça baş menejeri Auraş Mahbodyň aýtmagyna görä, «optimizirlenen» (optimized) nyşany oýnuň ýokary hilli oýun tejribesi üçin ähli talaplara laýyk gelýändigini, «oýnap bolýar» (playable) nyşany bolsa, oýnuň kompýuterde işlemegi üçin zerur bolan iň pes talaplara laýyk gelýändigini görkezýär. «Barlanylmadyk» (untested) diýip bellik edilen oýunlar bolsa, diňe ady anyk gözleg arkaly tapylsa, dükanda görkeziler. Bu nyşanlar Steam platformasyndaky belliklere meňzeýär.
Häzirki wagtda bu platformada 50-den gowrak oýun bar. Google bu platformany şu ýyl ähli kompýuter oýunlaryny işläp düzüjilere açmagy meýilleşdirýär.
Mahbodanyň sözlerine görä, Google Play Games hyzmaty şu ýylyň dowamynda hemmeler üçin elýeterli bolar.
