Firefly Aerospace hususy amerikan kompaniýasynyň Blue Ghost moduly Aýyň üstüni işjeň öwrenmäge başlady. Mare Crisium-da asuda gonandan soň, enjam, beýlekiler bilen bir hatarda, LISTER tejribesine girişdi.
Onuň maksady Aýyň üstüni 3 metre çenli burawlap, onuň jümmüşinden ýylylyk akymyny öwrenmekden ybarat.
Taslama NASA, Tehasyň tehnologiýa uniwersiteti we Honeybee Robotics kompaniýasy tarapyndan işlenip düzüldi.
“Dürli nokatlardan alnan maglumatlary seljerip, biz hemranyň milliardlarça ýyllap nädip sowandygyny anyklap bileris” – diýip, ylmy gözlegiň ýolbaşçysy Seýiçi Nagihara düşündirýär.
Hödürlenen wideo regoliti böwsüp geçip, pytraňňylary dargadýan robotizirlenen dreliň işini görkezýär. Burawlama wagty Aýyň üstüniň elektrik bilen zarýadlanandygy sebäpli döreýän uçgunlar görünýär. Her 50 sm-den zond topragyň ýylylyk geçirijiligini barlap, üstden aşaky gatlaklaryň kartasyny döredýär.
LISTER-den başga-da, enjam ýene dokuz tejribe geçirer. Olaryň arasynda elektrik meýdanlarynyň kömegi bilen tozana garşy göreş tehnologiýasy we regolitiň dürli materiallar bilen birleşmek mümkinçiligini öwrenmek bar.
Günortanyň yssysyndan başlap, aşa sowuk gijeler ýaly şertlere garamazdan, enjam işlemegini dowam etdirýär. Firefly kompaniýasynyň aýtmagyna görä, Aýda günortan güýçli gyzma sebäpli gysga wagtlyk “arakesmä gidenden” soň, Blue Ghost sowady we ýene täze açyşlara taýýar. Onuň maglumatlary diňe bir ylmy işler üçin däl, eýsem adamzadyň kosmosda ornaşmagynda amaly çözgütler üçin esas bolar.
