Türkmen döwlet bedenterbiýe we sport instituty «Ýaşlarymyz geljege uly ynam bilen, sportda ösüşler sanly ulgam bilen» atly V internet bäsleşigini yglan etdi. Bäsleşige Türkmenistanyň ähli ýokary okuw mekdepleriniň islendik hünärde bilim alýan talyplary gatnaşyp biler.
Bäsleşik bedenterbiýe we sport bilen gyzyklanýan giň dünýägaraýyşly, zehinli ýaşlary ýüze çykarmak maksady bilen geçirilýär.
Internet bäsleşigi Türkmen döwlet bedenterbiýe we sport institutynda hereket edýän bilim portalynyň, elektron okuw we synag ulgamynyň, resmi web-saýtynyň we milli elektron poçtasynyň üsti bilen geçirilýär.
Bäsleşige gatnaşmaga isleg bildirýänler baradaky maglumatlar 2025-nji ýylyň 12-nji apreline çenli bellenilen nusga laýyklykda taýýarlanylyp, guramaçylyk toparynyň tdbsi@sanly.tm milli elektron poçtasyna ugradylmagy arkaly hasaba alynýar.
Internet bäsleşiginiň soraglary we jogap kagyzynyň nusgasy 2025-nji ýylyň 17-nji aprelinde irden sagat 08:00-da Türkmen döwlet bedenterbiýe we sport institutynyň elektron salgylarynda ýerleşdiriler.
Bäsleşige gatnaşyjylara bedenterbiýe we sport ugry boýunça düzülen 50 (elli) sany sorag hödürlener. Gatnaşyjylar soraglaryň jogaplaryny ýörite iberilen jogap kagyzynyň elektron görnüşine dolduryp, 17-nji aprelde sagat 23:59-a çenli tdbsi@sanly.tm milli elektron poçtasyna ibermeli. Görkezilen wagtdan soň iberilen işler bäsleşige kabul edilmeýär.
Internet bäsleşiginde üstünlikli çykyş eden talyplar Türkmen döwlet bedenterbiýe we sport institutynyň I, II, III derejeli diplomlary bilen sylaglanar.
Bäsleşigiň netijeleri Türkmenistanyň Bedenterbiýe we sport baradaky döwlet komitetiniň «Türkmenistan Sport» halkara žurnalynda we onuň «7/24.tm» atly hepdelik elektron goşundysynda, «Türkmen sporty» gazetinde çap ediler.
Bäsleşigiň Düzgünnamasy bilen şu salgydan tanşyp bilersiňiz.
