Dizaýner Demna Gwasaliýa Balenciaga-nyň täze güýz-gyş kolleksiýasyny görkezdi. Bu kolleksiýa onuň soňky on ýylda eden işleriniň beýany boldy diýip, «Vogue» neşiri ýazýar.
Dizaýner özüniň işini «„adaty“ egin-eşikleriň dürli görnüşlerini öwrenmek» diýip atlandyrdy. Daşary ýurtly bilermenleriň pikirine görä, ol «Balenciaga äleminde» döreden esasy egin-eşik kategoriýalaryny we stilleriň aýratynlyklaryny metodiki usulda ele aldy.
Kolleksiýanyň görkezilişi ofis stilindäki kostýumlar bilen başlady, olaryň käbiri häsiýetli «ýyrtyk» görnüşde taýýarlanylypdyr. Yzysüre işjeň egin çyzykly, denimden, deriden we dartylan trikotaždan bir düwmeli paltolar görkezildi.
Soň bolsa Gwasaliýanyň aýratyn nyşanyna öwrülen keşpler peýda boldy: ýyrtyk futbolkalar, «wampir» kardiganlar, giň hudiler, futuristik gara äýnekler, uzyn joraply aýakgaplar, deriden, ýüňden we düşek matasyndan tikilen halatlar hem-de köýnekler.
Kolleksiýa Puma bilen bilelikde taýýarlanylan, dar sport eşikleri bilen baýlaşdyryldy. Moda görkezilişi bolsa, Balenciaga brendiniň «olimpiýa» medallary bilen bezelen modeller bilen jemlendi.
