Amerikaly Skott Malis geçen aý Gawai adalaryndaky (Ýuwaş ummany) Kilauea wulkanynyň atylan mahaly emele gelen «lawanadony», ýagny lawa tornadosyny wideo ýazga aldy diýip, «Daily Mail» neşiri habar berýär.
Malisiň wideo ýazgysynda wulkan krateriniň düýbünde gyzgyn lawanyň (magmanyň) möwjeýändigi we şol bir wagtda kiçijek girdabyň erän dag jynslarynyň üstünden aýlanyp geçýändigini görmek bolýar.
Hünärmenleriň aýtmagyna görä, şeýle hadysalar ergin magmanyň üstündäki howany gyzdyrmagy netijesinde ýüze çykýar. Aşa gyzan howa dykyzlygyny ýitirip, ýokaryk galýar. Eger şemalyň ugry we tizligi laýyk gelse, gyzgyn howa sütüni aýlanyp, tornadony emele getirip bilýär.
